Evaluering av effektane av godkjenning av utanlandsk utdanning
I kva grad bidrar godkjenning av utanlandsk utdanning til at fleire kjem i relevant jobb? No gjennomfører Statistisk sentralbyrå (SSB) ei evaluering av effektane av dei frivillige godkjenningstenestene som HK-dir forvaltar. Evalueringa skal gje ny kunnskap som kan brukast til å vidareutvikle og forbetre tenestene. Resultata frå evalueringa blir etter planen publisert i første kvartal i 2027.
HK-dir forvaltar tre frivillige godkjenningstenester for utanlandsk utdanning:
- generell godkjenning av høgare utdanning
- generell godkjenning av høgare yrkesfagleg utdanning (fagskuleutdanning)
- godkjenning av fag- og yrkesopplæring
Målet med godkjenningstenestene er å bidra til at personar med utdanning frå utlandet kjem inn på arbeidsmarknaden, og dermed får arbeid og lønn som samsvarar med kvalifikasjonane deira.
Målet med evalueringa er å få eit betre kunnskapsgrunnlag om effektane av godkjenningstenestene. Evalueringa ser mellom anna på effektar på:
- tilknyting til arbeidsmarknaden
- sosial mobilitet
- overkvalifisering og manglande samsvar mellom utdanning og jobb («mismatch»)
SSB bruker eigne registerdata og koplar desse med data frå HK-dir om personar som har søkt om godkjenning.
