Venstre og MDG reagerer på at student blei kasta ut av landet
Juliana Mattsson, ein student frå USA, blei utvist frå Noreg mens ho tok del i eit kulturutvekslingsprogram. Årsaka til utvisinga var at Utlendingsdirektoratet (UDI) meiner at Mattson hadde tatt seg arbeid på garden. No blir saka hennar tema på Stortinget.
– Meiner statsråden at deltaking på denne type utvekslingsprogram i Noreg, som einaste land i Europa, skal sidestillast med arbeidsinnvandring slik at folk risikerer å bli arresterte og utvist frå Schengen?
Dette skriv stortingsrepresentant Alfred Bjørlo frå Venstre i eit brev til justisminister Emilie Enger Mehl (Sp) datert den 9. september.
– Det må gå an å finne ein grenseoppgang slik at vi gjer unntak for denne typen verksemd, utan å tillate ulovleg arbeidsinnvandring, seier Bjørlo.
Heller ikkje stortingsrepresentant for Mijøpartiet Dei Grøne, Rasmus Hansson, er særleg imponert over måten UDI praktiserer lovverket på i denne saka.
– Kor i alle dagar er folkevitet i UDI? Dette er stivna byråkratisk dusteri med heilt urimelege konsekvensar, skriv han til NRK.
NRK har vore i kontakt Justisdepartementet for å kunne intervjue justisminister Emilie Enger Mehl om denne saka. Ministeren svarer via kommunikasjonsavdelinga si at ho ikkje kan svare før ho har svart på Alfred Bjørlo sitt spørsmål i Stortinget.