Må betale fleire hundre tusen for ulovleg turisttransport i Lofoten
I takt med at turismen i nord aukar, blir søkelyset stadig sett på ein auke i ulovlege aktørar, trafikkfarlege tilstandar og urettferdig konkurranse. Skatteetaten, Nav og Arbeidstilsynet undersøker fleire reiselivsverksemder etter storkontroll i Lofoten. Dei avdekka fleire tilfelle av ulovleg frakt av turistar.
A-krimsenteret har kontrollert sju reiselivsaktørar i Lofoten som del av ein større innsats mot reiselivsnæringa i Nord-Noreg.
Både norske og utanlandske reiselivsoperatørar fekk besøk. Leiaren av a-krimsenteret i Nordland seier dei har sett at guiding og køyring av turistar er eit risikoområde.
Seks personar og fire selskap har fått førelegg og må tole inndraging av til saman 450.000 kroner.
A-krimsenteret vil intensivere kontrollane framover, særleg før nordlyssesongen, og fleire etatar undersøker nå de kontrollerte bedriftene vidare.
– Vi vil bruke verkemidla i verktøykassa for å avdekke ulovleg verksemd. Dessverre er det mange utanlandske turoperatørar som kjem til Nordland, og der er det vanskeleg å førebygge, seier leiar på a-krimsenteret, Kurt Kolvereid Jacobsen.
Han seier a-krimsenteret blir godt tatt imot av den seriøse delen av næringa.
